Psalms 111

הללו יה אודה יהוה בכל לבב בסוד ישרים ועדה:

גדלים מעשי יהוה דרושים לכל חפציהם:

הוד והדר פעלו וצדקתו עמדת לעד:

זכר עשה לנפלאתיו חנון ורחום יהוה:

טרף נתן ליראיו יזכר לעולם בריתו:

כח מעשיו הגיד לעמו לתת להם נחלת גוים:

מעשי ידיו אמת ומשפט נאמנים כל פקודיו:

סמוכים לעד לעולם עשוים באמת וישר:

פדות שלח לעמו צוה לעולם בריתו קדוש ונורא שמו:

ראשית חכמה יראת יהוה שכל טוב לכל עשיהם תהלתו עמדת לעד:

Salmos 111