Psalms 99

יהוה מלך ירגזו עמים ישב כרובים תנוט הארץ:

יהוה בציון גדול ורם הוא על כל העמים:

יודו שמך גדול ונורא קדוש הוא:

ועז מלך משפט אהב אתה כוננת מישרים משפט וצדקה ביעקב אתה עשית:

רוממו יהוה אלהינו והשתחוו להדם רגליו קדוש הוא:

משה ואהרן בכהניו ושמואל בקראי שמו קראים אל יהוה והוא יענם:

בעמוד ענן ידבר אליהם שמרו עדתיו וחק נתן למו:

יהוה אלהינו אתה עניתם אל נשא היית להם ונקם על עלילותם:

רוממו יהוה אלהינו והשתחוו להר קדשו כי קדוש יהוה אלהינו:

Žalmy 99